ဘိလပ်မြေများအား ကော့သောင်းနယ်စပ်ကုန်သွယ်ရေးစခန်းမှ တင်သွင်းခွင့်ပြု

ဇန်နဝါရီ ( ၃၀ )ရက်။

Myanmar Property Dealer

 ဆောက်လုပ်ရေးလုပ်ငန်းများတွင် အဓိကအသုံးပြုတဲ့ ဘိလပ်မြေများအား ကော့သောင်းနယ်စပ်ကုန်သွယ်ရေးစခန်းမှ တင်သွင်းခွင့်ပြုကြောင်း ဘိလပ်မြေတင်သွင်းခွင့်ဆိုင်ရာ တာဝန်ရှိသူများက သတင်းထုတ်ပြန်ထားရှိပါတယ်။

ယခုအချိန်က ပွင့်လင်းရာသီရောက်ရှိလာပြီဖြစ်သဖြင့် နိုင်ငံတစ်ဝန်းတွင် ဆောက်လုပ်ရေး လုပ်ငန်းများအား အရှိန်အဟုန်ဖြင့် ဆောင်ရွက်လျက်ရှိရာ ဆောက်လုပ်ရေး လုပ်ငန်းအတွက် မရှိမဖြစ်လိုအပ်တဲ့ ပြည်တွင်းဘိလပ်မြေ လိုအပ်ချက် ပြည့်မီစေရန်နှင့် ပြည်တွင်းဘိလပ်မြေ ထုတ်လုပ်မှုများကို အားဖြည့်ရန်အတွက် ကော့သောင်းနယ်စပ် ကုန်သွယ်ရေးစခန်းမှလည်းကောင်း၊ ပင်လယ်ရေကြောင်းမှလည်းကောင်း ဘိလပ်မြေများအား ၂၀၂၅ ခုနှစ်၊ ဇန်နဝါရီလ နောက်ဆုံးပတ်မှစတင်ပြီး တင်သွင်းခွင့်ပြုလျက်ရှိကြောင်း သိရပါတယ်။

 ပြည်တွင်းရှိ ဆောက်လုပ်ရေးလုပ်ငန်းများတွင် အသုံးလိုတဲ့ ဘိလပ်မြေအိတ်များကို တရုတ်၊ ထိုင်းနှင့် မလေးရှားနိုင်ငံတို့မှ အဓိကတင်သွင်းနေရတယ်လို့လည်းသိရပါတယ်။

ဘိလပ်မြေကို ယခင်က တင်သွင်းခွင့်ပိတ်ထားတဲ့အပြင် ပြည်တွင်းမှာပါထုတ်လုပ်နိုင်ခြင်းမရှိတာကြောင့် ဘိလပ်မြေအိတ်များအဆမတန်ဈေးမြင့်တက်ခဲ့ပြီး ဆောက်လုပ်ရေးလုပ်ငန်းအချို့ရပ်နားခဲ့ရကြောင်း သိရပါတယ်။