ရှေးမူလက်ရာမပျက်စေဘဲ ပြုပြင်ထိန်းသိမ်းရန်လိုနေတဲ့ရန်ကုန်တိုင်း တရားလွှတ်တော် ရှေးဟောင်းအဆောက်အအုံ

ဩဂုတ် (၂၅)ရက်။

Myanmar Property Dealer

 ရန်ကုန်တိုင်းဒေသကြီး ကျောက်တံတားမြို့နယ် ပန်းဆိုးတန်းလမ်းရှိ ရန်ကုန်တိုင်းဒေသကြီးတရားလွှတ်တော် ရှေးဟောင်းအဆောက်အအုံအား ရှေးမူမပျက် ပြန်လည်ပြုပြင်ထိန်းသိမ်းနိုင်ရန်အတွက် ဆောင်ရွက်နေတယ်လို့  နိုင်ငံပိုင်သတင်းစာရဲ့ဖော်ပြချက်အရသိရပါတယ်။

အဆိုပါ တရားလွှတ်တော် အဆောက်အအုံမှာ အလျား ၂၉၉ ဒသမ ၆ ပေ အနံ ၂၈၈ ပေရှိ စတုဂံပုံသဏ္ဌာန် သုံးထပ်အဆောက်အအုံ ဖြစ်ပြီး ၁၉ဝ၅ ခုနှစ်တွင် စတင်တည်ဆောက်ခဲ့တာ ၁၉၁၁ ခုနှစ်တွင် ပြီးစီးခဲ့တာဘဲဖြစ်ပါတယ်။ အဲဒီချိန်ကကုန်ကျငွေမှာ ရူပီး ၂ ဒသမ ၄၅ သန်းဖြစ်ပြီး အဆိုပါအဆောက်အအုံတွင် ၂၀၁၁ ခုနှစ်အထိ နိုင်ငံတော်၏ အမြင့်ဆုံးတရားစီရင် ရေးအဖွဲ့အစည်းအဆက်ဆက် ရုံးထိုင်ပြီး အမှုများစစ်ဆေးကြားနာစီရင်ခဲ့ပြီး သမိုင်းတန်ဖိုးမြင့်မား သော ရှေးဟောင်းအဆောက်အအုံတခုဘဲဖြစ်ပါတယ်။ 

၂၀၀၈ ခုနှစ် ပြည်ထောင်စုသမ္မတမြန်မာနိုင်ငံတော် ဖွဲ့စည်းပုံအခြေခံဥပဒေနှင့် ၂၀၁၀ ပြည့်နှစ် ပြည်ထောင်စုတရားစီရင်ရေးဥပဒေတို့အရ ဖွဲ့စည်းခဲ့တဲ့ရန်ကုန်တိုင်းဒေသကြီး တရားလွှတ်တော်သည်လည်း ၂၀၁၁ ခုနှစ်မှစတင်ပြီးယနေ့တိုင် အဆိုပါ အဆောက်အအုံတွင် ရုံးထိုင်ပြီးတရားစီရင်ရေးလုပ်ငန်းတာဝန်များ ဆောင်ရွက်လျက်ရှိနေတယ်လို့သိရပါတယ်။  

 ရန်ကုန်မြို့တော်စည်ပင်သာယာရေးကော်မတီ၊ အင်ဂျင်နီယာဌာန (အဆောက်အအုံ)က ၁၉၉၆ ခုနှစ် တွင် အဆောက်အအုံကို ရှေးဟောင်းလက်ရာ အဆောက်အအုံအဖြစ် သတ်မှတ်ခဲ့ပြီး ရန်ကုန်မြို့ပြ အမွေအနှစ် ထိန်းသိမ်းစောင့်ရှောက်ရေးအဖွဲ့က ရန်ကုန်မြို့ပြအမွေအနှစ် (Yangon City Heritage) အဆောက်အအုံအဖြစ် အပြာရောင်ကမ္ပည်းပြား (Blue Plaque) ကို ၂၀၁၇ ခုနှစ် နိုဝင်ဘာ ၂၄ ရက်တွင် တပ်ဆင်ခဲ့ကြောင်းနိုင်ငံပိုင်သတင်းစာရဲ့ဖော်ပြချက်အရသိရပါတယ်။