Home  / News  / News Details

သတင်း အသေးစိတ်

သတ်မှတ်ကာလအတွင်း အသုံးမချနိုင်သည့် မြေလွတ်၊ မြေလပ်နှင့် မြေရိုင်းများကို အရေးယူမည်ဟု ပြည်ထောင်စုဝန်ကြီးပြော

Nov 15, 2026  /

သတ်မှတ်ကာလအတွင်း အသုံးမချနိုင်သည့် မြေလွတ်၊ မြေလပ်နှင့် မြေရိုင်းများကို အရေးယူမည်ဟု ပြည်ထောင်စုဝန်ကြီးပြော အသုံးပြုခွင့်နှင့် လုပ်ပိုင်ခွင့်ရရှိထားသော်လည်း သတ်မှတ်ကာလအတွင်း ထိရောက်အကျိုးရှိစွာ အကောင်အထည်ဖော်ဆောင်ရွက်နိုင်ခြင်းမရှိသည့် မြေလွတ်၊ မြေလပ်နှင့် မြေရိုင်းဧရိယာများကို ဥပဒေနှင့်အညီ အရေးယူဆောင်ရွက်သွားမည်ဖြစ်ကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီး ဦးမင်းနောင်က ပြောကြားသည်။ ပြည်ထောင်စုဝန်ကြီးသည် နိုဝင်ဘာ ၁၃ ရက် နံနက်ပိုင်းက နေပြည်တော်ရှိ ပြည်ထောင်စုဝန်ကြီးရုံး စုဝေးဆောင်ခန်းမတွင် ကျင်းပသည့် ဒုတိယအကြိမ် မြေလွတ်၊ မြေလပ်နှင့် မြေရိုင်းများ စီမံခန့်ခွဲရေးဗဟိုကော်မတီအစည်းအဝေး၌ အထက်ပါအတိုင်း ပြောကြားခဲ့ခြင်းဖြစ်သည်။ မြေလွတ်၊ မြေလပ်နှင့် မြေရိုင်းများဆိုင်ရာ လုပ်ပိုင်ခွင့်၊ အသုံးပြုခွင့်လျှောက်ထားမှုများနှင့်ပတ်သက်၍ သက်ဆိုင်ရာဝန်ကြီးဌာနများထံ သဘောထားမှတ်ချက် တောင်းခံရာတွင် ကြန့်ကြာမှုမရှိစေရေးအတွက် ဗဟိုကော်မတီဝင်များအနေဖြင့် မိမိတို့ဝန်ကြီးဌာနရှိ ရုံးအဖွဲ့များကို အချိန်မီပြန်ကြားပေးနိုင်ရန် တိုက်တွန်းပေးရမည်ဖြစ်ကြောင်းလည်း ၎င်းက ဆိုသည်။ ထို့ပြင် လုပ်ပိုင်ခွင့်နှင့် အသုံးပြုခွင့်ရရှိထားသော်လည်း သတ်မှတ်ကာလအတွင်း လုပ်ငန်းများကို ထိရောက်အကျိုးရှိစွာ ဆောင်ရွက်နိုင်ခြင်းမရှိသည့် မြေဧရိယာများကို သက်ဆိုင်ရာ စီမံခန့်ခွဲရေးကော်မတီများက ဥပဒေ၊ နည်းဥပဒေပါ ပြဋ္ဌာန်းချက်များနှင့်အညီ စိစစ်ပြီး ဗဟိုကော်မတီသို့ တင်ပြရမည်ဖြစ်ကြောင်း၊ တင်ပြလာသည့်အပေါ် ဥပဒေနှင့်အညီ မှန်ကန်စွာ အရေးယူဆောင်ရွက်သွားရမည်ဖြစ်ကြောင်း ပြည်ထောင်စုဝန်ကြီးက ပြောကြားသည်။ အလားတူ မြေလွတ်၊ မြေလပ်နှင့် မြေရိုင်းများအတွက် မြေခွန်ပေးဆောင်မှုနှင့်ပတ်သက်၍ သီးနှံအမျိုးအစား၊ လုပ်ငန်းအမျိုးအစားအလိုက် မြေခွန်ကင်းလွတ်ခွင့်ကာလ ကုန်ဆုံးသည့်နေ့မှစတင်ကာ တစ်နှစ်လျှင်တစ်ကြိမ် ပေးသွင်းစေရန် ၂၀၂၆ ခုနှစ် ဇွန် ၁ ရက်မှစ၍ မြေခွန်နှုန်းထားအသစ်ဖြင့် ကောက်ခံလျက်ရှိကြောင်း သိရသည်။ မြေခွန်များ အပြည့်အဝပေးဆောင်စေရေးနှင့် ပေးဆောင်ရန် ပျက်ကွက်သူများကို ဥပဒေနှင့်အညီ အရေးယူနိုင်ရေးအတွက် တိုင်းဒေသကြီးနှင့် ပြည်နယ်အဆင့် စီမံခန့်ခွဲရေးကော်မတီများက ကြီးကြပ်ဆောင်ရွက်ကြရန်လည်း ပြည်ထောင်စုဝန်ကြီးက တိုက်တွန်းပြောကြားခဲ့သည်။