သုခဒဂုံပြည်သူ့အငှားအိမ်ရာနေထိုင်ခွင့် ဒုတိယအဆင့် မဲပေါက်ထားသူများ မေလအတွင်း အိမ်လခပေးသွင်းပြီး စာချုပ်ချုပ်ဆိုရမည်

ဧပြီလ(၂၉)ရက်။

Myanmar Property Dealer

ဒဂုံမြို့သစ်(‌တောင်ပိုင်း)မြို့နယ်မှာ တည်ဆောက်ထားတဲ့သုခဒဂုံပြည်သူ့အငှားအိမ်ရာ ဒုတိယအဆင့်တွင် မဲပေါက်ထားသူများ အိမ်လခပေးသွင်းခြင်းနှင့် စာချုပ်ချုပ်ဆိုခြင်းတို့ကို လာမည့် မေလအတွင်း ဆောင်ရွက်ရမှာဖြစ်တယ်လို့ ဆောက်လုပ်ရေးဝန်ကြီးဌာန၊ မြို့ပြနှင့်အိမ်ရာဖွံ့ဖြိုးရေးဦးစီးဌာန(ရန်ကုန်)မှ သိရပါတယ်။

ဒဂုံမြို့သစ် (တောင်ပိုင်း)မြို့နယ်၊ အမှတ် (၂) လမ်းမကြီးနှင့် ရန်ကုန်မြို့ပတ်လမ်းမကြီးလမ်းဆုံအနီးတွင် အကောင် အထည်ဖော် တည်ဆောက်ထားတဲ့သုခဒဂုံပြည်သူ့အငှားအိမ်ရာ ဒုတိယအဆင့် တိုက် ၅၀ လုံး၏ အခန်းပေါင်း ၈၀၀ အနက် တိုက် ၄၈ လုံး၏ အခန်းပေါင်း ၇၆၈ ခန်းအတွက် မီတာများရရှိပြီး၊ လာမယ့်မေလအတွင်း အခန်းများထဲတွင် တပ်ဆင်သွားမှာဖြစ်တယ်လို့သိရပါတယ်။

လာမယ့်မေလအတွင်း သုခဒဂုံပြည်သူ့အငှားအိမ်ရာ ဒုတိယအဆင့်တွင် မဲပေါက်ထားသူများ အိမ်ငှားရမ်းခွင့်အတွက် အိမ်လခပေးသွင်းခြင်းနှင့် စာချုပ်ချုပ်ဆိုခြင်းများ ဆောင်ရွက်သွားမှာဖြစ်ပြီး၊တိုက်အလိုက် ငွေပေးသွင်းရမယ့်ရက်များကို ထပ်မံအသိပေးသွားမှာဖြစ်တယ်လို့သိရပါတယ်။

အဆိုပါ သုခဒဂုံပြည်သူ့အငှားအိမ်ရာရှိ အိမ်ခန်းများအား နေရေးအခက်အခဲရှိသော ပြည်သူများ၊ အငြိမ်းစားဝန်ထမ်းများနှင့် လက်ရှိတာဝန်ထမ်းဆောင်ဆဲ နိုင်ငံ့ဝန်ထမ်းများအား သတ်မှတ်ငှားရမ်းခနှုန်းထားဖြင့် ငှားရမ်းနေထိုင်ခွင့်ပြုထားခြင်းလည်းဖြစ်ပါတယ်။

(သဲသဲ)