သုခဒဂုံပြည်သူ့အငှားအိမ်ရာရှိ ဈေးသစ်မကြာမီဖွင့်လှစ်မည်

ဖေဖော်ဝါရီ (၁၉)ရက်။

Myanmar Property Dealer

သုခဒဂုံပြည်သူ့အငှားအိမ်ရာတွင် နေထိုင်သူများအတွက် ဈေးသစ် မကြာမီဖွင့်လှစ်သွားမှာဖြစ်တယ်လို့ရန်ကုန်တိုင်းဒေသကြီးအစိုးရအဖွဲ့မှ သိရပါတယ်။

ရန်ကုန်တိုင်းဒေသကြီးအစိုးရအဖွဲ့၏ ဒေသဖွံ့ဖြိုးရေး ရန်ပုံငွေဖြင့် ရန်ကုန်မြို့တော်စည်ပင်သာယာရေးကော်မတီက သုခဒဂုံဈေးသစ်တည်ဆောက်ခြင်းကို ၂၀၂၄ ခုနှစ်၊ မေလက စတင်တည်ဆောက်ခဲ့ရာ မကြာမီ ဖွင့်လှစ်နိုင်ရန် အချောသပ်လုပ်ငန်းများ ဆောင်ရွက်လျက်ရှိနေတာပဲဖြစ်ပါတယ်။

သုခဒဂုံပြည်သူ့အငှားအိမ်ရာသည် ရန်ကုန်တိုင်းဒေသကြီး၊ ဒဂုံမြို့သစ်(တောင်ပိုင်း) အမှတ်(၂)လမ်းမကြီးနှင့် အမှတ်(၇)လမ်းမကြီးတို့အနီးတွင် တည်ရှိပြီး သုခဒဂုံဈေးသစ် ကြီးကို အမှတ်(၂)လမ်းမကြီးနှင့် မနီးမဝေးသောနေရာတွင် တည်ဆောက်ပေးထားခြင်းကြောင့် သုခဒဂုံအငှားအိမ်ရာတွင် နေထိုင်သောပြည်သူများအတွက် သွားလာမှုအဆင်ပြေစေမှာဖြစ်တယ်လို့လည်းသိရပါတယ်။

သုခဒဂုံဈေးရုံများတည်ဆောက်ခြင်း စီမံကိန်းအကျယ်မှာ ၃ ဒသမ ၅၆ ဧကရှိပြီး၊ အရှည် ၁၀၉ ပေနှင့် အကျယ် ၄၈ ပေရှိ ဈေးရုံခုနစ်ရုံပါဝင်ကာ ၎င်းဈေးရုံများအတွင်း ၆ ပေပတ်လည်အကျယ်ရှိ ဈေးဆိုင်ခန်း စုစုပေါင်း ၃၉၂ ဆိုင် ဖွင့်လှစ်ရောင်းချနိုင်ရန် တည်ဆောက်ထားတာဖြစ်တယ်လို့လည်းသိရပါတယ်။

 ဒါ့အပြင် ဈေးရုံခုနစ်ရုံ၏ မျက်နှာစာအနီး ခေါင်းရွက်ဗျပ်ထိုးနှင့် ကုန်စိမ်းသီးနှံအမျိုးမျိုး၊ ခြံထွက်ပန်းအမျိုးမျိုးနှင့် ကုန်ပစ္စည်းအမျိုးမျိုး ရောင်းဝယ်မှုပြုလုပ်နိုင်ရန်အတွက် အရှည်ပေ ၂၀၀ နှင့် အကျယ် ၉၄ ပေ၊ အမြင့် ၆ လက်မရှိ ကွန်ကရစ်ခင်းလဟာပြင်ဈေးကိုလည်း ထည့်သွင်းတည်ဆောက်ပေးထားတယ်လို့လည်းသိရပါတယ်။

 လက်ရှိမှာတော့ အများသုံးသန့်စင်ခန်း သုံးလုံး၊ ကား ၄၈ စီးခန့်ရပ်နားနိုင်တဲ့ ကားရပ်နားရန်နေရာများ၊ ကုန်တင်ကုန်ချနေရာများ၊ အမှိုက်စွန့်ပစ်နိုင်သော ကွန်ကရစ်အမှိုက်ကန်များ၊ ဈေးရုံများ၊ စီမံခန့်ခွဲရေးရုံး၊ လဟာပြင်ဈေးသည်များအတွက် လေကာပင်များနှင့် အရိပ်ရသစ်ပင်ကြီးများကို စိုက်ပျိုးထားရှိနေတယ်လို့ လည်းသိရပါတယ်။