ငလျင်ဒဏ်သင့်ခဲ့တဲ့အများနှင့်သက်ဆိုင်သောအဆောက်အဦများအားလှူဒါန်းလိုပါကပါဝင်လှူဒါန်းနိုင်

ဧပြီလ (၉)ရက်။

Myanmar Property Dealer

ငလျင်ဒဏ်သင့်ခဲ့ရတဲ့ သာသနိကနှင့်ဘာသာရေးဆိုင်ရာအဆောက်ဦများ၊ ပညာရေး၊ကျန်းမာရေးနှင့် အများနှင့်သက်ဆိုင်သောအဆောက်အဦများအား အဆောက်အဦတစ်ခုချင်းအလိုက် တာဝန်ယူပြီး ပြုပြင်မွမ်းမံအသစ်တည်ဆောက် လှူဒါန်းလိုသူများအနေဖြင့် ပါဝင်လှူဒါန်းနိုင်တယ်လို့ ဖိတ်ခေါ်ထားပါတယ်။

မတ် ၂၈ ရက်နေ့တွင် မန္တလေးမြေငလျင်စခန်းမှ အရှေ့မြောက်ဘက် ၂၁ ကီလို မီတာကွာဝေးတဲ့ မြန်မာနိုင်ငံပြည်တွင်း အနက် ၁၀ ကီလိုမီတာကိုဗဟိုပြုပြီး ပြင်းအား ၇.၇ ရစ်(ခ်)တာစကေးရှိ အလွန်ပြင်းထန်တဲ့ မြေငလျင်လှုပ်ခတ်ခဲ့မှုကြောင့် သာသနိကနှင့် ဘာသာရေးဆိုင်ရာအဆောက်ဦများ၊ ပညာရေး၊ ကျန်းမာရေးစသည့် အများနှင့်သက်ဆိုင်သော အဆောက်အဦများ ထိခိုက်ပျက်စီးခဲ့ရတာပါ။

အဆိုပါ အဆောက်အဦများအနက် အဆောက်အဦတစ်ခုချင်းအလိုက် တာဝန်ယူပြီး ပြုပြင်မွမ်းမံ အသစ်တည်ဆောက်လှူဒါန်းလိုသူများအနေဖြင့် တစ်ဦးချင်းဖြစ်စေ၊ အဖွဲ့လိုက်ဖြစ်စေ ရာသက်ပန်ကမ္ဗည်းထိုးပြီး ပါဝင်လှူဒါန်းနိုင်ကြောင်းနှင့် လှူဒါန်း လိုသူများအနေဖြင့် သက်ဆိုင်ရာဌာနများသို့လည်းကောင်း၊ အမျိုးသားသဘာဝဘေး အန္တရာယ်ဆိုင်ရာစီမံခန့်ခွဲမှု ကော်မတီမှဖော်ပြထားတဲ့ ပုဂ္ဂိုလ်များထံသို့လည်းကောင်း ဆက်သွယ် လှူဒါန်းနိုင်ကြောင်း အသိပေးထုတ်ပြန်ထားရှိပါတယ်။