Yangon Amata Smart & Eco City စီမံကိန်း၂ဝ၂၅ ခုနှစ်တွင်ပြီးစီးရန်လျာထား

 နိုဝင်ဘာလ(၂၆)ရက်။

Myanmar Property Dealer

ရန်ကုန်တိုင်းဒေသကြီးအတွင်းရှိ  မြေဧရိယာ(၂ဝဝဝ)ဧကပေါ်မှာ ဆောင်ရွက်လျက်ရှိနေတဲ့ Yangon Amata Smart & Eco City စီမံကိန်းကို လာမယ့်နှစ် ၂ဝ၂၅ ခုနှစ်တွင်ပြီးစီးရန်လျာထားတယ်လို့ ပတ်ဝန်းကျင်ထိခိုက်မှုဆန်းစစ်ခြင်း(EIA) အစီရင်ခံစာအရ သိရပါတယ်။

 အဆိုပါစီမံကိန်းပြီးစီးပါက  နိုင်ငံအတွက် တစ်နှစ်လျှင် ဝင်ငွေခွန် အမေရိကန်ဒေါ်လာသန်း (၆ဝ)ရရှိနိုင်မှာဖြစ်ပြီးစီမံကိန်းနှင့်ပတ်သက်တဲ့ ဆောက်လုပ်ရေးကာလကိုလည်း  ၂ဝ၂ဝ ပြည့်နှစ်မှ ၂ဝ၂၅ ခုနှစ်အထိ သတ်မှတ်ထားတယ်လို့လည်းသိရပါတယ်။

Yangon Amata Smart & Eco City စီမံကိန်းကို ရန်ကုန်တိုင်းရှိ ဒဂုံမြို့သစ်(အရှေ့ပိုင်း)နှင့် ဒဂုံမြို့သစ်(တောင်ပိုင်း)မြို့ နယ်အတွင်း လေးထောင့်ကန်ကျေးရွာအနီးတွင် အကောင်အထည်ဖော်ဆောင်ရွက်နေတာဖြစ်ပြီး ၎င်းစီမံကိန်းအား ထိုင်းနိုင်ငံ Amata Corporation PCL  ကုမ္ပဏီခွဲတစ်ခုဖြစ်တဲ့ Yangon Amata Smart & Eco City ကုမ္ပဏီနှင့် ဆောက်လုပ်ရေးဝန်ကြီးဌာန၊ မြို့ပြနှင့်အိမ်ရာဖွံ့ဖြိုးရေးဦးစီးဌာနတို့က ပူးပေါင်းဆောင်ရွက်နေတာလည်းဖြစ်ပါတယ်။

ပြီးခဲ့တဲ့ ၂ဝ၁၈ ခုနှစ်အတွင်း Yangon Amata Smart & Eco City စီမံကိန်းအား အကျိုးတူပူးပေါင်းဆောင်ရွက်ရန်အတွက် သဘောတူစာချုပ်ချုပ်ဆိုခဲ့ခြင်းဖြစ်ပြီး စီမံကိန်းပြီးစီးသွားပါက အလုပ်အကိုင်အခွင့်အလမ်း (၃၃၀၀၀) အထိ ဖန်တီးပေးနိုင်မှာ ဖြစ်တယ်လို့လည်းသိရပါတယ်။