ပြည်ပမှ တင်သွင်းထားသည့် ဘိလပ်မြေတန်ချိန် ၃,၀၀၀ ရန်ကုန်ဆိပ်ကမ်းသို့ ရောက်ရှိ

ဖေဖော်ဝါရီ (၂၆)ရက်။

Myanmar Property Dealer

 ဆောက်လုပ်ရေးလုပ်ငန်းများအတွက် ပြည်ပမှတင်သွင်းလာတဲ့ ဘိလပ်မြေတန်ချိန် ၃,၀၀၀ ရန်ကုန်ဆိပ်ကမ်းကို ရောက်ရှိလာပြီဖြစ်ပြီး ဈေးကွက်အတွင်း ဖြန့်ဖြူးရန်ဆောင်ရွက်လျက်ရှိနေတယ်လို့  ဘိလပ်မြေတင်သွင်းမှုနှင့်သက်ဆိုင်တဲ့ တာဝန်ရှိသူများက အသိပေးထုတ်ပြန်ထားရှိပါတယ်။

ယခုအခါ ကော့သောင်းနယ်စပ်ကုန်သွယ်ရေးစခန်းမှတစ်ဆင့် တင်သွင်းလာသော ဘိလပ်မြေ တန်ချိန် ၃,၀၀၀ ကို တင်ဆောင်လာတဲ့ ရေယာဉ်က ရန်ကုန်မြို့၊ ရွှေပြည်သာ မုတ္တမဆိပ်ကမ်းသို့ ရောက်ရှိလာတာဖြစ်ပါတယ်။

ပွင့်လင်းရာသီသို့ ရောက်ရှိလာပြီဖြစ်ပြီး နိုင်ငံတစ်ဝန်းတွင် ဆောက်လုပ်ငန်းများအား အရှိန်အဟုန်ဖြင့်ဆောင်ရွက်လျက်ရှိရာ ထိုသို့တည်ဆောက်မှုလုပ်ငန်းများအတွက် ယခုကာလအတွင်း လိုအပ်တဲ့ ပြည်တွင်းဘိလပ်မြေလိုအပ်ချက်ကို ပြည့်မီစေရန်နှင့် ပြည်တွင်း ထုတ်လုပ်မှုအား အင်အားဖြည့်တင်းပေးနိုင်ရန်အတွက် ပြည်ပမှ ဘိလပ်မြေများကို တင်သွင်းခွင့်ပြုထားတာလည်းဖြစ်ပါတယ်။

 ဒါ့အပြင် ကျန်ဘိလပ်မြေတင်ဆောင်လာတဲ့ ရေယာဉ် များပါ အပတ်စဉ်ဆက်လက်ရောက်ရှိလာမှာဖြစ်တယ်လို့သိရပါတယ်။

ယင်းအပြင်ပြည်တွင်းမှာထုတ်လုပ်လျှက်ရှိတဲ့  ဘိလပ်မြေများ တိုးမြှင့်ထုတ်လုပ်နိုင်ရန် ပြည်တွင်းရှိ ဘိလပ်မြေစက်ရုံများအတွက် လိုအပ်သောစက်မှုကုန်ကြမ်း ကျောက်မီးသွေးများကို ဖေဖော်ဝါရီလမှစတင်ပြီး ပြည်ပမှ တင်သွင်းခွင့်ပြုထားကြောင်း ဘိလပ်မြေတင်သွင်းမှုနှင့်သက်ဆိုင်တဲ့တာဝန်ရှိသူများက ဖေဖော်ဝါရီ ၇ ရက်တွင် အသိပေးထုတ်ပြန်ထားရှိတာလည်းဖြစ်ပါတယ်။