ရန်ကုန်ဈေးကွက်တွင် အိမ်၊ ခြံ၊ မြေဝယ်ယူရင်းနှီးမြှုပ်နှံသူ နည်းပါးပြီး ရွှေစုသူများလာနေ

ဧပြီလ(၂၆)ရက်။

Myanmar Property Dealer

ရန်ကုန်အိမ်၊ခြံ၊မြေဈေးကွက်တွင် အိမ်ခြံမြေဝယ်ယူရင်းနှီးမြှုပ်နှံသူ နည်းပါးနေပြီး ရွှေစုသူများလာတယ်လို့  ဈေးကွက်အတွင်းမှ စုံစမ်းသိရှိရသည်။

 " လက်ရှိမှာက အိမ်ခြံမြေကိုဝယ်တာထက် ရွှေစုသူပိုများလာတယ်။ ရွှေဈေး၊ငွေဈေးတတ်လို့ အိမ်ခြံမြေကိုပိုပြီးရင်းနှီးမြှုပ်နှံမယ်ထင်ထားတာ။ အခုမဟုတ်တော့ဘူး။ အခုပွဲစားတွေကိုမေးလိုက်ရင် အရောင်းအဝယ်ကောင်းလားဆို မကောင်းဘူး။ အငှားဈေးကွက်ကတော့ တော်တော်ဖြစ်တယ်။ ဈေးကလည်းမြောက်တယ်" ဟုအိမ်ခြံမြေအကျိုးတော်ဆောင်လုပ်ကိုင်နေသူတစ်ဦးကပြောပါတယ်။

လက်ရှိအခြေအနေအရ အိမ်၊ခြံ၊မြေ အရောင်းအဝယ်နှင့်ပတ်သက်၍ ခန့်မှန်းရန်စောနေသေးပြီး မြေပြင်အခြေအနေတွင် ဈေးကွက်တည်ငြိမ်နေပြီး အရောင်းအဝယ်အေးနေကြောင်း၊ ဒါ့အပြင် ခေါ်ဈေးနှင့်ပေးဈေးကွာဟနေတဲ့ အနေအထားဖြစ်နေတယ်လို့လည်းသိရပါတယ်။

 ‘’အငှားဈေးကွက်ထဲမှာ လုံးချင်း၊ တိုက်ခန်း၊ ကွန်ဒိုအငှားဈေးကွက်ပိုဖြစ်နေကြတယ်။ " ဥပမာ တိုက်ခန်းတစ်ခုဝယ်ပြီးရင် ရောင်းဖို့ကကြာတယ်။ အဲဒီတော့ ဘယ်သူမှသိပ်မရင်းနှီးကြတော့ဘူး။ ဝယ်ပြီးပြန်ငှားထားကြတာများတယ်"ဟုလည်း ၎င်းကဆက်လက်ပြောပြတာပါ။

လက်ရှိအိမ်၊ခြံ၊မြေဈေးကွက်တစ်ခုလုံးတွင် လုံးချင်းအိမ်ထက် မြေကွက်များကအရောင်းအဝယ်ပိုဖြစ်နေ

တယ်လို့လည်းသိရှိရပါတယ်။

(သဲသဲ)