အောက်တိုဘာ ၂၀

Myanmar Property Dealer

ရန်ကုန်တိုင်းဒေသကြီး အစိုးရအဖွဲ့ရဲ့ လမ်းညွှန်မှုဖြင့် ရန်ကုန်မြို့တော်စည်ပင်သာယာ ရေးကော်မတီက ကြီးကြပ် တည်ဆောက်မယ့် ဒဂုံမြို့နယ် ဦးဝိစာရလမ်း ရွှေတိဂုံစေတီ တော် (အနောက်ဘက်မုခ် နှင့် ပြည်သူ့ရင်ပြင်) မြေအောက် လမ်းကူး လူသွားဥမင်တည်‌ ဆောက်ခြင်း မြေသန့်မင်္ဂလာ အခမ်းအနားကို အောက်တိုဘာ- ၁၉ရက်နေ့က ကျင်းပခဲ့ကြောင်းသိရပါတယ်။

အဆိုပါ မြေအောက်လမ်း ကူးလူသွားဥမင် (Underpass) တည်ဆောက်ရခြင်းမှာ ရွှေတိဂုံ စေတီတော်နှင့် ပြည်သူ့ရင်ပြင် အကြား ပြည်သူများသွားလာရာတွင် ယာဉ်အန္တရာယ်ကင်းရှင်းစေ ရေးနှင့် သက်သောင့်သက်သာ ဖြတ်သန်းသွားလာနိုင်ရန်နှင့် ခေတ်မီအခြေခံအဆောက်အဦ တစ်ခု ထပ်မံပေါ်ပေါက်လာစေ ရန်ရည်ရွယ်၍ တည်ဆောက်ရခြင်းဖြစ်တယ်လို့လည်းသိရပါတယ်။

ယခုတည်ဆောက်မယ့် မြေအောက်ဥမင်မှာ လူသွားလမ်း အကျယ် ၂၃ ပေ၊ အလျား ၄၆၁ ပေ ၉ လက်မ၊ ဝင်ထွက်ပေါက် လေးခု၊ ရွေ့လျား စက်လှေကား လေးစင်း၊ မသန်စွမ်းသူများ အသုံးပြုရန် ဓာတ်လှေကား ၁၀ ယောက်စီးနှစ်စင်းပါဝင်မှာဖြစ်ပြီး စီမံကိန်းကာလ ၁၄ လခန့် ကြာမြှင့်မှာဖြစ်တယ်လို့လည်းသိရပါတယ်။

ပြီးခဲ့တဲ့ ၂၀၂၁ ခုနှစ် အောက်တိုဘာ ၇ ရက်နေ့က မြန်မာနိုင်ငံရဲ့ပထမဆုံး မြေအောက်ဥမင်လူကူးလမ်း (Underpass) တစ်ခုကို ကမာရွတ်မြို့နယ်၊ ဟံသာဝတီအဝိုင်းအနီး ပြည်လမ်းမကြီးတွင် ဖွင့်လှစ်ခဲ့ပြီးဖြစ်သည်။