ရန်ကုန်ရှိ အိမ်ခြံမြေဈေးကွက် ကြိုက်စျေးခေါ်၍ အရောင်းအဝယ်ဖြစ်နေ

ဇန်နဝါရီလ (၂)ရက်။

Myanmar Property Dealer

၂၀၂၄ နှောင်းပိုင်းဖြစ်ပွားလာတဲ့တိုက်ပွဲများကြောင့် ရန်ကုန် မြို့ပေါ် ကို စစ်ဘေးရှောင်သူများပြားလာခြင်းနှင့်အတူ အိမ်ခြံမြေဈေးကွက်ကလည်း ကြိုက်စျေးခေါ်ပြီး အရောင်းအဝယ်ဖြစ်နေကြတယ်လို့ အိမ်ခြံမြေစျေးကွက်လုပ်ငန်းလုပ်ကိုင်သူများရဲ့ ပြောပြချက်အရ သိရပါတယ်။

ရွှေ့ပြောင်းသူများလာခြင်းကြောင့် အိမ်ခြံမြေ ဝယ်ရောင်းများရဲ့လက်ထဲတွင် ကြိုက်စျေးခေါ်ခြင်းများဖြစ်လာပြီး စျေးနှုန်းတွေကလည်း ပုံမှန် ဝယ်ငှားစျေးများထက် ၃ ဆနီးပါးမြင့်တက်သွားတယ်လို့လည်းသိရပြီးအများစုမှာ တာမွေ၊ စမ်းချောင်း၊ ကြည့်မြင့်တိုင်၊ ဗဟန်း၊ ဒဂုံမြို့သစ်မြောက်ပိုင်း၊ သာကေတ၊ရွှေပြည်သာ၊ လှိုင်သာယာ၊ မှော်ဘီနှင့် ဒဂုံဆိပ်ကမ်းမြို့နယ်များတွင် အများဆုံးငှားရမ်းမှုရှိကြတယ်လို့လည်းသိရပါတယ်။

ဒါ့အပြင် အခြေခံလူတန်းစားများနေထိုင်ကြတဲ့ ဒဂုံဆိပ်ကမ်းမြို့နယ်အတွင်းရှိ ယုဇနအိမ်ရာရှိ အခန်းခများသည်ပင်  ၂၀၂၃ ခုနှစ်တွင် ပထမထပ်တိုက်ခန်း ငှားရမ်းခသည် ကျပ် ၁ သိန်း ၂ သောင်း ရှိရာမှ ၂၀၂၄ ခုနှစ်တွင် ကျပ် ၂ သိန်းမှ ၃ သိန်းခွဲအထိ စျေးပေါက်နေကြောင်း သိရပါတယ်။

 အလားတူ ဒဂုံမြို့သစ်မြောက်ပိုင်းရှိ အိမ်ခြံမြေတွေကလည်း အရောင်းအဝယ်တော်တော်လိုက်နေသလို အငှားဈေးကွက်တွေလည်း အလုပ်ဖြစ်နေကြတယ်လို့  အကျိုးတော်ဆောင်များကဆိုပါတယ်။