အမေရိကန်ဒေါ်လာ ၉ ဘီလျံပြန်ပေးနိုင်မှ သေဒဏ်ကလွတ်မယ့် ဗီယက်နမ်အိမ်ခြံမြေလုပ်ငန်းရှင်

ဒီဇင်ဘာလ (၅)ရက်။

Myanmar Property Dealer

 Van Thinh Phat Holdings Group (ဗန်သီဖတ်) အိမ်ခြံမြေလုပ်ငန်းရဲ့ ဥက္ကဋ္ဌ ဖြစ်သူ Truong My Lan(ကျူးမီလန်)ဟာ ဆိုင်ဂွန်စီးပွားရေးဘဏ်က ငွေတွေကို ဆယ်စုနှစ်တစ်စုကျော် မသမာတဲ့နည်းလမ်းတွေနဲ့ ရယူခဲ့တာကြောင့် ပြစ်မှုထင်ရှားတယ်လို့ဆိုပြီး ဗီယက်နမ်တရားရုံးတစ်ရုံးက သေဒဏ်ချမှတ်လိုက်ကြောင်း နိုင်ငံပိုင်မီဒီယာက ဖော်ပြထားပါတယ်။

 အမေရိကန်ဒေါ်လာ ၁၂ ဘီလီယံ အလွဲသုံးစားလုပ်မှုနဲ့ လာဘ်ပေးလာဘ်ယူမှု စွဲချက်တင်ခံထားရတဲ့ Lan(လန်) ဟာ ဗီယက်နမ်နိုင်ငံရဲ့ အကြီးမားဆုံး ငွေကြေးလိမ်လည်မှုမှာ မှတ်တမ်းဝင်ခဲ့တာဖြစ်ပါတယ်။

သေဒဏ်ချမှတ်ခြင်းအပြင် Lan ကို လိမ်လည်မှု၊ ငွေကြေးခဝါချမှုနှင့် တရားမဝင် နယ်စပ်ဖြတ်ကျော် ငွေလွှဲမှုများ၊ ပိုင်ဆိုင်မှုကို ရယူမှုဖြင့် အပြစ်ရှိကြောင်း တွေ့ရှိပြီးနောက် ၂၀၂၄ အောက်တိုဘာလတုန်းက သီးခြားရုံးချိန်းမှာ Lan(လန်) ကို ထောင်ဒဏ်တစ်သက် ချမှတ်ထားတာဖြစ်ပါတယ်။

လန်က သူ့ရဲ့သေဒဏ်အတွက် အယူခံဝင်ထားသော်လည်း ပြီးခဲ့တဲ့ ဒီဇင်ဘာလ ၃ ရက်နေ့မှာ တရားရုံးကပယ်ချလိုက်တာကြောင့် အယူခံရှုံးနိမ့်သွားတာဖြစ်ပါတယ်။

ဒီကြားနာမှုမှာ ရုံးတော်က လန်ရဲ့သေဒဏ်ကို လျှော့ပေါ့ပေးရန် အကြောင်းရင်းမရှိကြောင်းနဲ့ အလွဲသုံးစားလုပ်ခဲ့တဲ့ ဒေါ်လာ ၁၂ ဘီလျံရဲ့ လေးပုံသုံးပုံဖြစ်တဲ့ ဒေါ်လာကိုးဘီလျံကို ပြန်ပေးနိုင်မယ်ဆိုပါက သေဒဏ်ကနေ ကင်းလွတ်နိုင်ကြောင်း စီရင်ချက်ချခဲ့တာဖြစ်ပါတယ်။

အခု လန်ရင်ဆိုင်နေရတဲ့ ပြသနာတွေက တရားရင်ဆိုင်မှုသမိုင်းမှာ မကြုံစဖူးဖြစ်ပြီး အလွဲသုံးစားလုပ်ထားတဲ့ ငွေကြေးပမာဏဟာ မကြုံစဖူး များပြားနေတယ်လို့ အစိုးရပိုင်အွန်လိုင်းသတင်းစာဖြစ်တဲ့ VietnamNet က အယူခံဝင်တဲ့ကြားနာပွဲမှ ပြောကြားချက်ကို ကိုးကားပြီး ရေးသားခဲ့တာဖြစ်ပါတယ်။

တရားခံရဲ့ လုပ်ရပ်တွေက လူ့အဖွဲ့အစည်း၊ ငွေကြေးဈေးကွက်၊ စီးပွားရေးကို ရှုထောင့်များစွာကနေထိခိုက်စေခဲ့တယ်လို့ ထပ်လောင်း ရေးသားထားပါတယ်။

အပြစ်ရှိကြောင်း ဝန်ခံခြင်း၊ နောင်တရကြောင်း ထွက်ဆိုခြင်း၊ အလွဲသုံးစားလုပ်ခဲ့တဲ့ ငွေကြေးပမာဏရဲ့ တစ်စိတ်တစ်ပိုင်းကို ပြန်လည်ပေးချေခြင်း အပါအဝင် လျော့ပါးသက်သာစေနိုင်တဲ့ အခြေအနေများစွာရှိကြောင်း Lan ရဲ့ရှေ့နေပြောကြားချက်ကို နိုင်ငံပိုင်မီဒီယာက ကိုးကားဖော်ပြသော်လည်း အစိုးရရှေ့နေများက ဒီအချက်တွေလုပ်ပြရုံနဲ့ မလုံလောက်ကြောင်း ပြောကြားခဲ့ပါတယ်။