သုခဒဂုံ ပြည်သူ့အငှားအိမ်ရာ Bus Terminal တစ်ခု ဆောင်ရွက်ရန်စီစဉ်နေ

ရန်ကုန်တိုင်းဒေသကြီး၊ ဒဂုံမြို့သစ် (တောင်ပိုင်း) မြို့နယ်ရှိ သုခဒဂုံ ပြည်သူ့အငှားအိမ်ရာတွင် YBS ခရီးသည်တင်ယာဉ်များ ရပ်နားရန်အတွက် Bus Terminal တစ်ခုကို ယခုနှစ်အတွင်းအကောင်အထည်ဖော် ဆောင်ရွက်သွားမှာဖြစ်တယ်လို့ YRTC မှ သိရပါတယ်။

အဆိုပါ Bus Terminal တစ်ခုကိုဆောက်လုပ်ရေးဝန်ကြီးဌာနက မြေနေရာအကျယ်အဝန်း ငါးဧက မြေနေရာပေါ်တွင်  ယခုနှစ်အတွင်း ဆောက်လုပ်သွားရန် စီစဉ်နေခြင်းလည်းဖြစ်ပါတယ်။

ယခုအခါ သုခဒဂုံ အိမ်ရာတွင် အခြေပြုပြီး YBS ယာဉ်လိုင်းလေးလိုင်းမှ အစီးရေ ၈၀ ခန့် နေ့စဉ်လာရောက်ပြေးဆွဲလျက်ရှိပြီးလက်ရှိ အမှတ် (၇၁)၊ အမှတ် (၈၁)၊ အမှတ် (၉၇) နှင့် အမှတ် (၁၁၈) အစရှိတဲ့YBS ယာဉ်လိုင်းများ လာရောက်ပြေးဆွဲနေရာ သုခဒဂုံ ပြည်သူ့အငှားအိမ်ရာအနီးမှ အမှတ် (၁) YBS ယာဉ်လိုင်းနှင့် အမှတ် (၄၆) YBS ယာဉ်လိုင်းတို့မှ ယာဉ်အစီးရေ ၂၂ စီးခန့် ပြေးဆွဲလျက်ရှိကြောင်း သိရပါတယ်။

ဒါ့အပြင် အိမ်ရာဝင်းအတွင်း ၃၉၂ ခန်းပါ ဈေးရုံ၇ ရုံ၊ လေဟာပြင်ဈေး၊ စီမံခန့်ခွဲရေးရုံး၊ အများသုံးသန့်စင်ခန်း၊ ယာဉ်ရပ်နားနေရာ၊ ကုန်တင်ကုန်ချနေရာ၊ အမှိုက်စွန့်ပစ်နေရာ၊ ရေလှောင်ကန်၊ ရေစင်၊ Box Culvert ကိုလည်းတည်ဆောက်သွားမှာဖြစ်ပြီးနောက်ပိုင်းတွင် စူပါမားကတ်များပါ လာရောက်ဖွင့်လှစ်နိုင်တဲ့အထိ ဆောင်ရွက်ပေးသွားမှာဖြစ်တယ်လို့  မြို့ပြနှင့်အိမ်ရာဖွံ့ဖြိုးရေး ဦးစီး ဌာနထံမှ သိရပါတယ်။

(သဲသဲ)