ကန်ဒေါ်လာ ၁၅ သန်းတန် အဆောက်အအုံ တည်ဆောက်နေတဲ့ MC ယူဂျယ်ဆော့

မတ်လ (၁၈)ရက်၊

Myanmar Property Dealer

တောင်ကိုရီးယားနိုင်ငံရဲ့ နာမည်ကြီး Running Man အစီအစဥ်ကနေ မြန်မာနိုင်ငံက လူတော်တော်များများသိလာခဲ့တဲ့ ယူဂျယ်ဆော့ ဆိုသူကတော့ ဝမ် ၂၀ ဘီလီယံတန်ဖိုးရှိတဲ့ အဆောက်အအုံ တစ်ခုကိုတည်ဆောက်နေတယ်လို့ သတင်းတွေကဖော်ပြထားကြပါတယ်။

၁၉၇၂ ခုနှစ် ဆိုးလ်မြို့မှာ မွေးဖွားခဲ့တဲ့ ယူဂျယ်ဆော့ ဟာ တောင်ကိုရီးယားရဲ့ comedian နဲ့ ရုပ်မြင်သံကြား အစီအစဉ် တင်ဆက်သူဖြစ်ပြီး လူကြိုက်များတဲ့ Infinite Challenge နဲ့ လက်ရှိထုတ်လွှင့်နေတဲ့ Running Man အစီအစဉ်အပါအဝင် အမျိုးမျိုးသော ရုပ်သံရှိုးများစွာကို လက်ခံကျင်းပခဲ့သူတစ်ယောက်ပဲဖြစ်ပါတယ်။

ဒီနေ့တင်ဆက်ပေးချင်တာကတော့ သူဟာ Antenna agency ရဲ့ တတိယအကြီးဆုံးရှယ်ယာပိုင်ဆိုင်သူဖြစ်ပြီး Antenna အနီးနားမှာပဲ မြေညီထပ် အပါအဝင် စုစုပေါင်း လေးထပ်ပါဝင်တဲ့ ဝမ် ၂၀ ဘီလီယံတန်ဖိုးရှိ စီးပွားရေးအဆောက်အအုံကို စတင်ဆောက်လုပ်နေပြီဆိုတဲ့အကြောင်းပဲဖြစ်ပါတယ်။

ဒီ အဆောက်အအုံဟာ အကျယ်အဝန်းအားဖြင့် ၁၇၉၅၄ ပေကျယ်ဝန်းပြီး   ရုံးခန်းနေရာအပြင် စားသောက်ဆိုင်တစ်ဆိုင်၊ ဓာတ်ပုံရိုက်စတူဒီယိုတစ်ခုနဲ့ ကားပါကင် ၁၂ နေရာပါ၀င်မှာဖြစ်ပါတယ်။ ယူဂျယ်ဆော့ဟာ ၂၀၂၃ ခုနှစ် ဒီဇင်ဘာလမှာ  အဆောက်အဦပါမစ်ကို လက်ခံရရှိပြီး ၂၀၂၄ ခုနှစ် မေလမှာ အုတ်မြစ်ချတဲ့ အစီရင်ခံစာကို အပြီးသတ်ခဲ့ပါတယ်။ ဒီအဆောက်အအုံကို  Strux မှ ဒီဇိုင်းနဲ့ ဆောက်လုပ်ရေးကို ကိုင်တွယ်နေပြီး ဖေဖော်ဝါရီ ၂၀၂၆ မှာပြီးစီးနိုင်ဖို့ မျှော်မှန်းထားပါတယ်။

မြေဝယ်ယူစျေးအနေနဲ့ ဝမ် ၁၁.၆ ဘီလီယံရှိပြီး၊ အဆောက်အဦဆောက်လုပ်စရိတ် ၈.၂ ဘီလီယံရှိကာ စုစုပေါင်း ၁၉.၈ ဘီလီယံ ကုန်ကျပြီး အမေရိကန်ဒေါ်လာအားဖြင့် ၁၅ သန်းတန်ကြေးရှိတယ်လို့သိရပါတယ်။

ဝယ်ယူမှုအပြီး လေးလခန့်အကြာမှာ လက်ရှိအဆောက်အအုံဟောင်းကိုဖြိုချခဲ့ပါတယ်။ သူဟာ  အာမခံဝမ် ၉.၂၄ ဘီလီယံကိုအကြွေးစနစ်နဲ့ မဟုတ်ဘဲ cash နဲ့ လုံးဝပေးချေခဲ့တယ်လို့ ဘဏ္ဍာရေးအဖွဲ့အစည်းက ဖော်ပြခဲ့ပါတယ်။

ဒီအဆောက်အအုံ တည်ဆောက်ပြီးသွားရင် ယူဂျယ်ဆော့ ရဲ့ ရုပ်သံထုတ်လွှင့်ခြင်းနဲ့ ဖျော်ဖြေရေးလုပ်ငန်းတွေကို တိုးချဲ့ဆောင်ရွက်နိုင်မှာဖြစ်တယ်လို့ သုံးသပ်မှုတွေလည်းရှိနေကြပါတယ်။

Kakao Entertainment ကနေ Antenna ရဲ့  ရှယ်ရာ ၂၀.၇% ကို ဝမ် 3 ဘီလီယံဖြင့် ဝယ်ယူခဲ့ပြီး ကုမ္ပဏီရဲ့ တတိယအကြီးဆုံးရှယ်ယာရှင်ဖြစ်လာသည့်နေ့မှာပဲ လူအများရဲ့  အာရုံစိုက်မှုကိုခံခဲ့ရပါတယ်။

ယူဂျယ်ဆော့ ဟာ Nonhyeon-dong(နွန်ရန်ဒွန်း) တစ်ခုတည်းမှာ ဝမ် ၃၀ ဘီလီယံခန့်တန်ဖိုးရှိတဲ့  အိမ်ခြံမြေပိုင်ဆိုင်မှုများကို ကိုင်ဆောင်ထားတယ်လို့ သိရပါတယ်။