ကျောက်မီးသွေးများကို ပြည်ပမှတင်သွင်းခွင့်ပြုမည်

ဖေဖော်ဝါရီ (၈)ရက်။

Myanmar Property Dealer

ဘိလပ်မြေစက်ရုံများအတွက်လိုအပ်နေတဲ့စက်မှုကုန်ကြမ်း ကျောက်မီးသွေးများကိုပြည်ပမှတင်သွင်းခွင့်ပြုတော့မှာဖြစ်တယ်လို့ ဘိလပ်မြေတင်သွင်းမှုနှင့်သက်ဆိုင်တဲ့ တာဝန်ရှိသူများကထုတ်ပြန်ထားရှိပါတယ်။

ပြည်တွင်းရှိစက်ရုံများ၏ ကုန်ထုတ်လုပ်မှုများ တိုးမြှင့်ဆောင်ရွက်နိုင်ရန်နှင့် ဘိလပ်မြေ စက်ရုံများ စဉ်ဆက်မပြတ် ကုန်ထုတ်လုပ်နိုင်ရေးအတွက် လိုအပ်တဲ့စက်မှုကုန်ကြမ်းများဖြစ်တဲ့ကျောက်မီးသွေးများအား ၂၀၂၅ ခုနှစ်၊ ဖေဖော်ဝါရီလမှစတင်ပြီး ပြည်ပမှ တင်သွင်းခွင့်ပြုပေးမှာ ဖြစ်တယ်လို့လည်းသိရပါတယ်။

ဒါ့အပြင်  ဘိလပ်မြေစက်ရုံများအနေဖြင့် သွင်းကုန်လိုင်စင်များ လျှောက်ထားနိုင်တယ်လို့လည်း အသိပေးထားရှိပါတယ်။

လက်ရှိမှာ နိုင်ငံတစ်ဝန်းတွင် ဆောက်လုပ်ရေးလုပ်ငန်းများအား အရှိန်အဟုန်ဖြင့် ဆောင်ရွက်လျက်ရှိရာ ဆောက်လုပ်ရေးလုပ်ငန်းများအတွက် ပြည်တွင်း ဘိလပ်မြေ ထုတ်လုပ်မှုများကို အားဖြည့်ရန်အတွက် ကော့သောင်းနယ်စပ် ကုန်သွယ်ရေးစခန်းမှ လည်းကောင်း၊ ပင်လယ်ရေကြောင်းမှလည်းကောင်း ဘိလပ်မြေများအား ၂၀၂၅ ခုနှစ်၊ ဇန်နဝါရီလ နောက်ဆုံးအပတ်မှစတင်ပြီး တင်သွင်းခွင့်ပြုထားတယ်လို့သိရပါတယ်။