ရွှေကုက္ကိုလ်နယ်မြေအတွင်းရှိ တရားမဝင်အဆောက်အအုံများအား စတင်ချိပ်ပိတ်သိမ်းဆည်း

နိုဝင်ဘာ (၂၈)ရက်။

Myanmar Property Dealer

 ရွှေကုက္ကိုလ်နယ်မြေအတွင်းရှိ တရားမဝင် အဆောက်အအုံများအား စနစ်တကျဖြိုချ ဖျက်ဆီးခြင်းများ ဆက်လက်ဆောင်ရွက်နေပြီး တရားမဝင်အဆောက်အအုံများအား စတင်ချိပ်ပိတ်သိမ်းဆည်းနေပြီဖြစ်တယ်လို့သိရပါတယ်။

 မြဝတီ-မဲ့ထော်သလေး (KK Park) နယ်မြေအတွင်း ရှိ အွန်လိုင်းလိမ်လည်လောင်းကစားမှု များ ကျူးလွန်ရာတွင် အသုံးပြုခဲ့တဲ့ အဆောက်အအုံများကို အပိုင်း(၃)ပိုင်းခွဲပြီး စနစ်တကျ ဖြိုချဖျက်ဆီးခြင်းများ ဆောင်ရွက်လျက်ရှိနေတာဖြစ်ပါတယ်။

အပိုင်း (၃) နယ်မြေအတွင်းရှိ တရားမဝင် အဆောက်အအုံ ၁၀ လုံးကို ထပ်မံဖြိုချ ဖျက်ဆီးခဲ့သဖြင့် အပိုင်း (၃) နယ်မြေ အတွင်းရှိ အဆောက်အအုံ ၄၂၅ လုံးအနက် ယနေ့အထိ ၁၀၈ လုံး ဖြိုချဖျက်ဆီး ခဲ့ပြီး KK Park နယ်မြေအတွင်းရှိ တရားမဝင်အဆောက်အအုံ စုစုပေါင်း ၆၃၅ လုံး အနက် ၂၅၆ လုံးကို ဖြိုချဖျက်ဆီးပြီးဖြစ်ကြောင်း သိရှိရပါတယ်။

ဒါ့အပြင် ရွှေကုက္ကိုလ် နယ်မြေအတွင်းရှိ လူနေအဆောက်အအုံများ၊ ဂိုဒေါင်များ၊ ဈေးဆိုင်ခန်းများ၊ ဟိုတယ်များနှင့် ကေတီဗွီများဖြစ်တဲ့တစ်ထပ်အဆောက်အအုံနှစ်လုံး၊ နှစ်ထပ် အဆောက်အအုံ ၁၁ လုံး၊ သုံးထပ်အဆောက် အအုံ ၄၂ လုံး၊ ခုနစ်ထပ်အဆောက်အအုံတစ်လုံး၊ ကိုးထပ်အဆောက်အအုံနှစ်လုံးနှင့် ၁၇ ထပ်အဆောက်အအုံ တစ်လုံးစုစုပေါင်း တရားမဝင်အဆောက်အအုံ ၅၉ လုံးတို့ကို ထပ်မံစစ်ဆေးခဲ့ရာ အွန်လိုင်းလိမ်လည်မှုနှင့် လောင်းကစားမှုလုပ်ငန်းများ လုပ်ကိုင်နေသူများကို တွေ့ရှိရခြင်းမရှိဘဲ ဖုန်းမျိုးစုံ အလုံး ၁၂၀၊ ကွန်ပျူတာမျိုးစုံ ၂၁၂ လုံးနှင့် အသုံးအဆောင်ပစ္စည်းများကို စိစစ်တွေ့ရှိခဲ့ပြီး ဖော်ထုတ်ရှင်းလင်းခြင်းများကို ဆက်လက် ဆောင်ရွက်လျက်ရှိနေတယ်လို့လည်းသိရပါတယ်။

ရွှေကုက္ကိုလ်နယ်မြေအတွင်း အွန်လိုင်းလိမ်လည်မှုများ ဆောင်ရွက်ရာတွင်အသုံးပြုခဲ့တဲ့ အဆောက်အအုံများအား နိုဝင်ဘာ ၁၈ ရက်မှ စတင်စစ်ဆေးခဲ့ရာ ယနေ့အထိ တရားမဝင်အဆောက်အအုံ ၁၀၉ လုံးကိုတွေ့ရှိရပြီး အဆိုပါအဆောက်အအုံများအား ပြန်လည်အသုံးပြုမှုမရှိစေရေးအတွက် သိမ်းဆည်းချိပ်ပိတ်ခြင်းများကို ယနေ့တွင် စတင်ဆောင်ရွက်ကြရာ အဆောက်အအုံ ၂၁ လုံး ချိပ်ပိတ်သိမ်းဆည်းပြီးဖြစ်ကြောင်းသိရှိရပါတယ်။